“San Valentinu”, Luigi Vigna

2258

Ddara sira ulia tte sacciu scusciatàta
mentru quardu ‘n cielu e poi me riti,
ḍr’ immagine te tie me l’ia rrubbata
e t’aggiu vista, sarà ca nun ci criti.

A mmenzu l’infinitu firmamentu
brillavi cchiuj te tutt’e meju stelle.
‘nu seculu è duratu ddru mumentu
‘nu jentu sculiscìa rrizzandu ‘a pelle.

Jentu comu ‘nu suspiru chinu te tristezza,
‘nu strìnculu te chiantu ndusse all’occhi,
‘a luntananza ‘nfame ca l’amori spezza
me lassa sbacantùtu bramandu ci me tocchi.

Pubblicità

Core ntossacatu se ‘nfaccia t’intr’u nenzi,
rrivu llu ‘ncarizzu cu lle punte ti panzieri,
all’anima se bbìvara e me trapàna i senzi,
jeu era senza vita ci osci tie nun c’eri.
Luigi Vigna – Parabita

 

Pubblicità