Aucuri a tutti li signuri,
a cinca ete e a cci se sente,
aucuri ‘mprufumati comu fiuri,
purtati comu nu presente,
nu rracalu a bboni e fiacchi,
alli curaggiusi e alli vigliacchi,
allu pasturu ca nu sape ccu llegge…
allu dutturu ca ete laureatu in legge.
Aucuri sinceri allu cchiu’ crande scenziatu,
allu ciucciarrone ccu llu cervieddru
bbacatu,
a ccinca stu mumentu sta bbene allu mundu,
allu vecchiarieddru centenariu suturnu
a ccinca ete servu,a ccinca e’ patrunu,
allu stommucu chinu e a quiddru a ddasciunu
alli ricchi spundati ma senza cervieddru
allu ggeniu ncompresu perce’ povarieddru.
Alli servi te Ddiu,quiddri tutti ‘nchittati,
e a l’addri servi ca vane strazzati.
Aucuri a  le vittime te la cuerra,
a quiddri ca li chiangene ssusu a sta Terra.
A li ggiunalisti onesti e vinduti,
alli pacifisti ca portene iuti,
alli menefreghisti ca nu ndolene te fare,
a quiddri ca lu mundu lu olene salvare..
Aucuri a cinca sape ccunta ccu llu core,
e a cinca tene mposcia lu curtieddru,
n’aucuriu te fiducia allu pesciu traditore,
allu cchiu’furbu urpone,
allu cchiu’fessa auceddru…
Aucuri a tutti quanti, ca nde bbimu bbisognu,
ccu se pozza realizzare onni speranzusu sonnu…
Bon Natale a cinca ncete e cinca nde cuarda te lu cielu,
nu miraculu u 25,
a qquai nde serve ‘ppe daveru….

Aton Scorrano, Gallipoli

Pubblicità

Commenta la notizia!