Poesia al giornale e ai suoi lettori

by -
2 968
Il poeta gallipolino Uccio Piro dedica una poesia al giornale e ai suoi lettori.
 
 
A Piazzasalento (Riverente scrivo)
 
Benadittu ci la tinne
quidda idea straordinaria
cu te fazza nu giurnale
ca te lIeva la malaria.
 
Quandu ormai nu ‘nc’è cchiui sordi,
mancu ccatti li saràchi (1)
stu giurnale te lu dane
senza mancu cu lu pachi.
 
Jeu su’ becchiu e nu essu cchiui
comu quandu ssìa na fiata
e u giurnale me lu leggu
cu me ìnchia la sciurnata.
 
Ogni quindici lu spettu
du carusu cu lu ‘nduca
ca cu garbu e cu rispettu
me lu minte intra la buca.
 
Me lu piju e me lu trasu,
oju bìsciu te cci tratta
e me mintu a na ripàta,
me lu leggu intra nu fiatta.
 
E cusì ca jeu me ‘nformu
te ci trase e de ci ssìu,
nun essendu ‘ncora mortu,
jeu cusì me sentu viu.
 
Oju dicu ca me sentu
parte viva tu paese,
ca jeu ‘ncora me ‘ntaressu
te li fatti e de le imprese.
 
Dopu lettu nu lu strazzu
o lu menu alle rumàte,
me lu piegu e me lu azzu
tra le carte mei cchiù amate
 
M’hane dittu: “Stu giurnale,
nu ‘nde tene ormai segreti,
ca te tutti vene lettu,
puru te l’analfabeti.”
 
Nsomma, u populu lu legge,
sia li sani ca i malati
e de quiddu ca succede
simu tutti ormai ‘nfurmati.
 
Ma lu bellu sai qual’ete?
Ca cu senzu e cu ragione
face cronaca e te lassa,
lassa a te la conclusione.
 
Nu te cunta e nu te face
comu l’addi u partigianu,
nu te serve nu patrunu,
te ciujeddi ete rufianu.
 
Puru se te quandu-cquandu
ma oju dicu ogni fiata,
nu patruddu te lu mena
intra l’acqua ristagnata.
 
Ete cosa ca vae fatta
cu te dìsciata e cuscenze
senza scriva comu l’addi
quidde solite scemènze.
 
E mannangia la vecchiaia,
ca me tene cquai ‘nchiuvatu,
ca se no a male e bene
jeu na manu bb’era datu.
 
Puru ca te adde penne
ui basognu nu ‘nde bbiti,
siti tutti professori,
mesci boni tutti siti.
 
E allora sciati a nnanti,
senza a retu cu guardati,
ca auguri e cumprimenti
be facimu se accettati.
 
Quantu ulìa be ‘mbrazzu tutti
ringrazziàndube te core,
l’Anna, u Cosimu, u Vittoriu
lu Fernandu e l’Editore.
 
Comu puru tutti l’addi,
ca te firmene la “Chiazza”
nnamuràti te sta terra
tutti te sta stessa razza.
 
Puru la Maria Rusaria,
te cugnome De Lumè,
ca ricorda a tutti nui,
ca ‘u Salentu ‘ncora ‘ne’è
 
Cu nu essu mutu longu,
quandu scrìu e lu versu stiru,
cquai me fermu e … be saluta
cordialmente l’Ucciu Piru.
 
(1)     saràchi, salacca, specie di sardina. Antico detto popolare: “Nu tanimu sordi cu ‘nde ccattamu lu pane e ‘nde ccattamu saràchi!”

Commenta la notizia!