“L’era bbuta rriccujre…”, Luigi Vigna

M’era bbutu rriccujre
‘na francata tua t’essenza
sparpajata sus’u ‘i carni
dop’u sonnu te ‘na notte,
quandu ‘ncora nazzacàvi
tṛa durmir’e disciatata,
mentṛu ‘a pelle tua t’a mmane
‘ncarizzava i cinque senzi.

L’era bbuta rriccujre,
‘na francata te ddṛ’ essenza
quandu ‘ncora ssuperchiàva
e du tie sta me saziava,
l’era bbuta rriccujre
cu nde fazzu terapia
pe’ quandu ngafa l’anima
a menzu ‘a nostalgia.

L’era bbuta rriccujre…
E c’ia pututu riservare
pe’ quand’u tiempu senza tie
nu’ sse face mai passare,
pe quandu carca sozza
‘a neja t’a malincunia,
criandu dṛu malessere
ca è pesciu te ‘na malatia

Luigi Vigna – Parabita (Le)

Commenta la notizia!